Բելգիական Լիեժ քաղաքի ոստիկանությունը ձերբակալել է 107 ուսանողի, ովքեր դուրս են եկել փողոց՝ իրենց դժգոհությունը հայտնելով երկրի կրթական համակարգից։ Belga գործակալության փոխանցմամբ՝ ակցիայի մասնակիցներից ոմանք հրդեհել են քաղաքային ունեցվածքը։
Բողոքի ալիքը տարածվել է նաև բելգիական այլ քաղաքներում։ VRT հեռուստաընկերության տվյալներով՝ Բրյուսելում շուրջ 250 երիտասարդներ երթ են անցկացրել Կենտրոնական կայարանից՝ ընդդեմ կրթական քաղաքականության։ Արդեն մի քանի օր շարունակվող ցույցերի մասնակից ուսանողներն ու դպրոցականները բողոքում են համալսարաններում ուսման վարձերի բարձրացումից, գերծանրաբեռնված դասացուցակներից և լեփ-լեցուն լսարաններից։
Զուգահեռաբար, նմանատիպ ցույցեր դեռևս սեպտեմբերից ընթանում են նաև Ֆրանսիայում։ Ֆրանսիական ԶԼՄ-ների փոխանցմամբ՝ երիտասարդության ընդվզման հիմնական պատճառը կրթության ոլորտի քրոնիկ ֆինանսավորման պակասն է։ Ուսանողները բարձրաձայնում են ուսուցիչների սուր պակասի, հիվանդացած ուսուցիչներին արագ փոխարինելու անհնարինության, հանրակացարանների ու ուսումնական մասնաշենքերի մաշվածության և ուսումնական նյութերի ցածր որակի մասին։
Ֆրանսիայի ազգային կրթության նախարարության տվյալներով՝ չորեքշաբթի օրը 459 ուսումնական հաստատություններում դասերը լրիվ կամ մասնակի չեղարկվել են։ Միևնույն ժամանակ, ֆրանսիական կրթական հանրույթի հմուտ արհմիությունները կոչ են անում հինգշաբթի օրը գործադուլներ և ցույցեր անցկացնել՝ ի աջակցություն բողոքող ուսանողների։
