Ադրբեջանական քաղաքական գիծն ու այնտեղից հնչող հռետորաբանությունը լավագույնս արտահայտում են այդ երկրի տրամադրվածությունն ու իրական նպատակները Հայաստանի Հանրապետության հարցում։ Այս մասին սոցիալական ցանցերում հրապարակված իր գրառման մեջ նշել է նախկին պատգամավոր Տիգրան Աբրահամյանը։
Նա մասնավորապես ընդգծել է․
«ՀՀ-ին ռազմական հանցագործություններ վերագրելը, Բաքվում պահվող հայ գերիների փաստը շահարկելը, ՀՀ-ին պարտադրված ադրբեջանական պահանջներն ընդգծելը ցույց են տալիս, որ Ադրբեջանի նպատակը ոչ թե խաղաղությունն է, այլ մեր երկրին մաքսիմալ «քամելը»: Անարգանքը, թշնամանքը, ագրեսիան, չարությունը, որոնք արտահայտվում են հայի ու հայ ժողովրդի նկատմամբ, երկու երկրներին ոչ մի պարագայում խաղաղության չեն հասցնի»:
Քաղաքական գործչի գնահատմամբ՝ ադրբեջանական կողմի որդեգրած կոշտ հռետորաբանությունն ու շարունակվող ճնշումները հստակորեն վկայում են, որ հարևան երկրի իրական օրակարգում կառուցողական երկխոսության փոխարեն գերիշխում են ուժային և սպառնալիքների վրա հիմնված մոտեցումները։
