Եվրոպական միությունում ավիաուղևորների հիմնարար իրավունքների բարեփոխման շրջանակում նախատեսվում է թույլատրել ստանդարտ տոմսով ճանապարհորդողներին ինքնաթիռի սրահ անվճար տանել ձեռքի ուղեբեռի երկու միավոր։
Նոր կանոնների համաձայն՝ ուղևորները, բացի նստատեղի տակ տեղավորվող անձնական իրից (պայուսակ կամ ուսապարկ), կկարողանան անվճար փոխադրել նաև մինչև 7 կգ քաշով և 100 սմ ընդհանուր չափսերով մեկ մեծ պայուսակ։ Այս փոփոխությունները նպատակ ունեն վերջ դնելու ավիաընկերությունների կողմից ձեռքի ուղեբեռի համար գանձվող հավելյալ վճարներին։
Նախատեսվում է, որ նորմերն ուժի մեջ կմտնեն ոչ շուտ, քան 2027 թվականի վերջին։ Ընդ որում, Brexit-ից հետո Մեծ Բրիտանիայի ավիափոխադրողները չեն տարածի այս կանոնները բրիտանական օդանավակայաններից մեկնող չվերթների վրա՝ դրանք կիրառելով միայն ԵՄ երկրներից հետադարձ թռիչքների դեպքում։
