Թուրքիայի նախագահ Ռեջեփ Թայիփ Էրդողանն Իսրայելին մեղադրել է Գազայի հատվածում ցեղասպանություն իրականացնելու և պաղեստինյան անկլավը «աշխարհի խոշորագույն համակենտրոնացման ճամբարի» վերածելու մեջ։ Այս մասին հայտնում է ТАСС-ը։
«Զինադադարը, որը պահպանում են մեր պաղեստինցի եղբայրները, հազարավոր անգամներ խախտվել է Իսրայելի հոսանքի կողմից։ 2025 թվականի հոկտեմբերի 11-ին հրադադարի համաձայնագրի ուժի մեջ մտնելուց ի վեր՝ Իսրայելի հարձակումների հետևանքով զոհվել է 1․5 հազար պաղեստինցի, ավելի քան 5 հազարը ստացել են վիրավորում։ Հանցավոր ցանցը, որը ցեղասպանություն է իրականացնում Գազայում և իրեն վեր է դասում միջազգային իրավունքից, այն վերածել է աշխարհի խոշորագույն համակենտրոնացման ճամբարի»,- Ստամբուլում ընթացող միջազգային իրավաբանական ֆորումի ժամանակ հայտարարել է Էրդողանը։
Թուրքիայի ղեկավարի խոսքով՝ հրեական պետությունը տարածաշրջանում խաղաղությունն ու հանգստությունը դիտարկում է որպես «սպառնալիք սեփական անվտանգությանը»։ Նա ընդգծել է, որ Անկարան լիովին դադարեցրել է առևտուրն Իսրայելի հետ և միացել է Միջազգային քրեական դատարանում Հարավաֆրիկյան Հանրապետության նախաձեռնած դատական գործընթացին։
«Թուրքիան պատրաստ է դիմանալ դժվարություններին, եթե դա անհրաժեշտ է, սակայն երես չի թեքի նրանցից, ովքեր հույս են կապում իր հետ և տառապում են անարդարությունից։ Քանի դեռ Գազայում ցեղասպանության մեղավորները պատասխանատվության չեն ենթարկվել, չի կարող խոսք լինել միջազգային համակարգի արդարության մասին»,- նշել է Էրդողանը։
Անկարայի կոշտ հռետորաբանությունը հերթական անգամ ընդգծում է Մերձավոր Արևելքում խորացող ճգնաժամը, որտեղ միջազգային հանրության անկարողությունն ու կրակը դադարեցնելու ձևական համաձայնագրերը չեն կարողանում կանխել մարդկային ողբերգությունն ու տարածաշրջանային անվտանգության լիակատար փլուզումը։
