Տարածքային կառավարման և ենթակառուցվածքների նախարարությունը e-draft հարթակում հրապարակել է միլիարդատեր գործարար Սամվել Կարապետյանին պատկանող Հայաստանի էլեկտրական ցանցեր ընկերությունը հանրային գերակա շահ ճանաչելու որոշման նախագիծը։ Այն դեռ պետք է հավանության արժանանա կառավարության նիստում։
Հանրային գերակա շահի մասին օրենքը սահմանում է, որ որոշման ընդունումից հետո սեփականատերը պետք է փոխհատուցում ստանա։ Հրապարակված նախագծում, սակայն, փոխհատուցման չափերի մասին ոչինչ չի նշվում։ Հայաստանում էլեկտրաէներգիայի մատակարար ընկերությունը հանրային գերակա շահ ճանաչելու հիմնավորման մեջ միայն նշվում է՝ «Հանրային ծառայությունները կարգավորող հանձնաժողովի կողմից լիցենզիայի դադարեցումը ցույց է տվել, որ պետությունը գնահատել է հնարավոր խախտումները որպես այնպիսիք, որոնք կարող են վնասել հարյուր հազարավոր բաժանորդների շահերը»։
