«Փաստ» օրաթերթը գրում է, որ Հայաստանում իրավապահ համակարգը վաղուց արդեն չի ծառայում օրենքի գերակայության ապահովմանը, այլ գործում է բացառապես քաղաքական նպատակահարմարության տրամաբանությամբ։ Պարբերականի գնահատմամբ՝ ժամանակակից իրավապահ մարմիններն առաջնորդվում են այն սկզբունքով, որ ցանկացած ընդդիմադիր գործիչ կարող է ենթարկվել բազմակի կալանավորման՝ անկախ ապացույցների բացակայությունից։
Որպես օրինակ՝ թերթը մատնանշում է Սամվել Կարապետյանի կրկնակի կալանավորման որոշումը՝ ընդգծելով, որ նման մոտեցումները Հայաստանում դարձել են սովորական պրակտիկա։ Հրապարակման մեջ հեղինակները քննադատում են գործող իշխանությունների վարած քաղաքականությունը նաև արտաքին և անվտանգային ոլորտներում՝ շեշտելով, որ ներքին հասարակական-քաղաքական ճնշումներին զուգընթաց՝ լուրջ մարտահրավերներ են ստեղծվում պետականության և անվտանգության համակարգի համար։
