Բրիտանական «Jaguar» ավտոարտադրողը ներկայացրել է իր նոր՝ ամբողջովին էլեկտրական «Type 01» մոդելը։ Նորույթի ցուցադրությունը հաջորդել է 2024 թվականին մեկնարկած աղմկահարույց ռեբրենդինգի շուրջ բռնկված քննադատությունների ալիքին, երբ ընկերությանը մեղադրում էին «վոկ» գաղափարախոսություն առաջ մղելու մեջ։
Նոր «Type 01»-ը չորսդռնանի շքեղ էլեկտրամոբիլ է, որի արտաքին տեսքում ակնհայտորեն նկատվում են 1960-ականների խորհրդանշական «E-Type» մոդելի ոճական լուծումները։ Հայտնի է, որ Մեծ Բրիտանիայում մեքենայի մեկնարկային գինը սահմանվել է 130 հազար ֆունտ ստեռլինգ, իսկ ամերիկյան շուկայում այն առաջարկվելու է 130 հազար դոլարով։
Չնայած ոճային հղումներին՝ մեքենայի արտաքին դիզայնը սոցիալական ցանցերում կրկին հակասական արձագանքների տեղիք է տվել։ Որոշ օգտատերեր և քննադատներ նորույթի տեսքն անվանել են «լիակատար աղետ»՝ այն նույնիսկ համեմատելով դիակառքի հետ, մինչդեռ ավտոմոբիլային ոլորտի հայտնի լրագրող Սթիվ Ֆաուլերը մոդելը գնահատել է բավականին տպավորիչ։
Նշենք, որ 2024 թվականին բրենդի ռազմավարության և նոր ուղղության ներկայացումը նույնպես արժանացել էր հանրության բուռն դժգոհությանը։ Սպասվում է, որ «Type 01»-ը կդառնա ընկերության կողմից պլանավորված լիովին էլեկտրական երեք նոր մոդելների շարքից առաջինը։
