Ֆրանսիական սուպերմարկետների սառնարանային համակարգերը շարքից հանած հզոր կիբերհարձակումները լուրջ դիվանագիտական լարվածություն են առաջացրել Փարիզի և Թեհրանի միջև։ Անցած ամիս տեղի ունեցած միջադեպերի հետևանքով հարյուրավոր խանութներ ստիպված են եղել ոչնչացնել արագ փչացող սննդամթերքի ամբողջ պաշարները, իսկ տուժածների թվում են հայտնվել այնպիսի խոշոր ցանցեր, ինչպիսիք են Carrefour-ը, Monoprix-ը, Intermarché-ն ու Coopérative U-ն։
Ֆրանսիական իշխանությունները կատարվածի հետևում տեսնում են իրանական հետքը՝ հիշեցնելով նաև 2023 թվականին Charlie Hebdo պարբերականի վրա կատարված հարձակումն ու 2024 թվականի Օլիմպիական խաղերի ժամանակ գրանցված միջադեպերը։ Փարիզն արդեն կանչել է Իրանի դեսպանին և ԵՄ մակարդակով պատժամիջոցներ պահանջել՝ զգուշացնելով, որ Ֆրանսիան պատրաստ է ձեռնարկել նաև չհրապարակվող կանխարգելիչ միջոցներ։
Թեհրանը, սակայն, կտրուկ հերքում է բոլոր մեղադրանքներն՝ անվանելով դրանք անհիմն և պնդելով, որ Ֆրանսիան պարզապես փորձում է սեփական կառավարման ձախողումները բարդել ուրիշների վրա։ Իրանի արտգործնախարար Աբաս Արաղչին սոցցանցերում հեգնանքով նշել է, թե ֆրանսիական կառավարությունը «չի կարողանում նույնիսկ սառնարաններին տեր կանգնել, ուր մնաց թե հոգա սեփական ժողովրդի կարիքները»։ Մինչ Եվրամիությունը պատրաստվում է կոշտ ու միասնական արձագանք տալ, նմանատիպ միջադեպեր են գրանցվել նաև ևս տասը եվրոպական երկրներում։
Աղբյուրը՝ Times.am
