Հոկտեմբերի 25-ին՝ ժամը 08:00-ից, Հայաստանի 10 մարզերի 21 համայնքներում բացվել են բոլոր 517 ընտրական տեղամասերը, և սահմանված կարգով մեկնարկել է տեղական ինքնակառավարման մարմինների ընտրությունների քվեարկությունը:
Արտաշատ, Արմավիր, Արաքս, Գավառ, Մարտունի, Վարդենիս, Հրազդան, Ծաղկաձոր, Գառնի, Արթիկ, Ախուրյան, Գորիս, Մեղրի, Եղեգնաձոր, Վայք, Ջերմուկ, Իջևան, Դիլիջան և Ստեփանավան համայնքներում ընտրություններն անցկացվում են համամասնական ընտրակարգով, որտեղ քաղաքացիները ընտրում են ավագանի: Ֆիոլետովո և Շամիրամ համայնքներում քվեարկությունն ընթանում է մեծամասնական ընտրակարգով՝ համայնքապետի և ավագանու անդամների ուղղակի ընտրության ձևաչափով:
Ընտրատեղամասերում ընտրողների նույնականացման և գրանցման նպատակով գործարկվել է 972 տեխնիկական սարքավորում։ Գործընթացի թափանցիկությունն ապահովելու համար Կենտրոնական ընտրական հանձնաժողովը (ԿԸՀ) հավատարմագրել է 6 դիտորդական առաքելություն, իսկ քվեարկությունն ու արդյունքների ամփոփումը լուսաբանում են 28 զանգվածային լրատվամիջոցների ներկայացուցիչներ։
Քվեարկությունն ավարտվելու է երեկոյան ժամը 20:00-ին: Ընտրությունների ընթացքին և պաշտոնական տվյալների թարմացումներին կարելի է հետևել ԿԸՀ պաշտոնական կայքէջում և ֆեյսբուքյան հարթակում։
