Կալանավորված երկրորդ նախագահ Ռոբերտ Քոչարյանի կրտսեր որդին՝ Լևոն Քոչարյանն այսօր հրավիրած ասուլիսում պնդեց՝ չունեն որևէ ապօրինի գույք, որը պետք է վերադարձնեն:
«Էդ մարդիկ էլ են ունեցել շանս: Ունեցել են շանս գալ, ասել՝ գիտե՞ք ինչ, մենք մի քանի միլիարդ գողացել ենք Հայաստանի Հանրապետությունից և ուզում ենք վերադարձնել Հայաստանի Հանրապետությանը», - հայտարարել է վարչապետ Նիկոլ Փաշինյանը:
Իրավապահների պնդմամբ՝ առանձնապես խոշոր չափերի փողերի լվացման և կաշառք ստանալու մեջ մեղադրվող Ռոբերտ Քոչարյանը իր նախագահության ընթացքում իր հետ մտերիմ անձանց հետ նախնական համաձայնությամբ, պաշտոնեական դիրքն օգտագործելով, տարբեր շինծու հիմքերով պետական սեփականությունից առանձնացրել և շուկայականից էականորեն ցածր գներով ձեռք է բերել հասարակական և տնտեսական նշանակություն ունեցող մի շարք արժեքավոր գույքեր: Այս գործի շրջանակում հիշատակվում են Play City-ն, Orange Fitness-ը, Piazza Grande-ն, Toyota-ն և այլ ընկերություններ: Դրանք իրավապահները կապարակնքել են ու փակել:
