«Հրապարակ» օրաթերթն անդրադարձել է «Քաղաքացիական պայմանագիր» կուսակցությունում սպասվող Երևանի քաղաքապետի ընտրություններին ընդառաջ խորացող մրցակցությանը և ներքին հակասություններին։
Թեպետ կուսակցական շրջանակներում նկատվում է լարվածություն, մասնավորապես՝ Ալեն Սիմոնյանի և Տիգրան Ավինյանի միջև, իշխանական թիմում լուրջ կասկածներ չկան, որ վերջինս շարունակում է մնալ հիմնական թեկնածուն։ Դա պայմանավորված է ոչ թե կառավարման արդյունավետությամբ, այլ այն հանգամանքով, որ վերջին տարիներին քաղաքապետը համայնքային ու պետական ապարատում ձևավորել է իրեն լիովին նվիրված կադրային համակարգ, ինչը բարդացնում է այլընտրանքային թեկնածուի առաջխաղացումը։
Ըստ թերթի տեղեկությունների՝ Նիկոլ Փաշինյանը, հետևելով «բաժանիր, որ տիրես» քաղաքական սկզբունքին, գիտակցաբար չի միջամտում թիմակիցների ներքին մրցակցությանը՝ թույլ տալով, որ նրանք զբաղվեն միմյանցով և հնարավորություն չունենան միավորվելու կամ հավաքական դավադրություններ հյուսելու վարչապետի դեմ։
Անդրադառնալով վերջին շրջանում հանրային հարթակներում հնչող քննադատություններին՝ պարբերականը նշում է նաև Աննա Հակոբյանի հրապարակային դժգոհությունները մայրաքաղաքի տրանսպորտային խցանումների և երթևեկության անհարմարությունների վերաբերյալ։
