Բաքվում Ուկրաինայի դիվանագիտական առաքելությունը «Համերաշխության էներգիա» նախագծի շրջանակում հավաքագրել է մոտ երկու տասնյակ էլեկտրական գեներատոր՝ պատերազմի հետևանքով վնասված էներգահամակարգին աջակցելու նպատակով։ Այս մասին իր հեղինակային հոդվածում տեղեկացրել է Ադրբեջանում Ուկրաինայի արտակարգ և լիազոր դեսպան Յուրի Գուսևը։
Դեսպանի փոխանցմամբ՝ ցուրտ եղանակի մոտենալուն զուգահեռ ռուսական հարվածների թիրախում հայտնված ուկրաինական բնակավայրերում էներգամատակարարման ապահովման խնդիրը դառնում է կենսական։ Հավաքված սարքավորումները, ըստ դիվանագիտական առաքելության ղեկավարի, տեղի մասնավոր հատվածի, հասարակական կազմակերպությունների և քաղաքացիների աջակցության արդյունքն են։
Յուրի Գուսևը հատուկ ընդգծել է Ադրբեջանի պաշտոնական իշխանությունների տրամադրած օգնության կարևորությունը։ Նրա խոսքով՝ Բաքվի տրամադրած տրանսֆորմատորները, էլեկտրական վահանակներն ու մալուխային համակարգերն անմիջականորեն նպաստում են ավերված ենթակառուցվածքների վերականգնմանն ու բնակչությանը էլեկտրաէներգիայով ապահովելուն։
Ուկրաինական կողմը մտադիր է առաջիկայում ընդլայնել հումանիտար աջակցության ծավալները, քանի որ ձմեռային ամիսներին ինքնավար էներգիայի աղբյուրների պահանջարկը շարունակում է մնալ ծայրահեղ բարձր։
