Ռուս-ուկրաինական հակամարտության կարգավորման շուրջ Ռուսաստանի, ԱՄՆ-ի և Ուկրաինայի ներկայացուցիչների մասնակցությամբ բանակցությունները տեղի կունենան նոյեմբերի առաջին կեսին Աբու Դաբիում (ԱՄԷ)։ Այդ մասին հայտարարել է ՌԴ նախագահի մամուլի քարտուղար Դմիտրի Պեսկովը։
Ռուսական լրատվամիջոցների փոխանցմամբ՝ Պեսկովը նշել է, որ եռակողմ հանդիպման հիմնական թեման լինելու է խաղաղ կարգավորման հասնելուց հետո Ռուսաստանի և Ուկրաինայի անվտանգության ապահովումը։
ՌԴ նախագահի մամուլի քարտուղարի խոսքով՝ հանդիպման ստույգ ամսաթիվը դեռ որոշված չէ, իսկ բանակցություններին եվրոպացի ներկայացուցչի մասնակցությունը կախված կլինի եվրոպական երկրների դիրքորոշումից։
Հիշեցնենք, որ Ռուսաստանի նախագահ Վլադիմիր Պուտինը և ԱՄՆ նախագահի հատուկ բանագնաց Ստիվ Ուիթքոֆը եռակողմ բանակցությունների անցկացման շուրջ պայմանավորվածություն էին ձեռք բերել հոկտեմբերի 21-ին Սանկտ Պետերբուրգում կայացած հանդիպման ընթացքում։
