Արդարադատության նախարարության քրեակատարողական ծառայությունը հայտնում է, որ թմրամիջոցների ապօրինի շրջանառության կասկածանքով ձերբակալվել է «Արթիկ» քրեակատարողական հիմնարկի անվտանգության ապահովման բաժնի ծառայող։
Ըստ ծառայության օպերատիվ վարչության «Արթիկ» տարածքային բաժնում ստացված տվյալների՝ հիշյալ աշխատակիցը հիմնարկի բնակելի գոտում զբաղվել է թմրամիջոցների իրացմամբ և սեպտեմբերի 13-ին նախատեսել էր որոշակի նյութական շահագրգռվածության դիմաց թմրանյութ փոխանցել ազատազրկված անձանց։
Օպերատիվ տեղեկությունների իրացման արդյունքում նույն օրը անցկացված համատեղ խուզարկությամբ ծառայողի մոտից հայտնաբերվել է 0,46 գրամ քաշով, թմրամիջոցի նմանվող սպիտակ փոշենման զանգված։
