Եվրոպացի առաջնորդները զգուշացնում են՝ Ռուսաստանի հետ լայնածավալ պատերազմն այս պահին ավելի քան հավանական է։ Այս մասին վերջին 24 ժամերին հայտարարեցին միանգամից երկու արևելաեվրոպական պետությունների ղեկավարներ։ Առաջինը Լեհաստանի վարչապետ Դոնալդ Տուսկն էր։ Դիմելով լեհական խորհրդարանի՝ Սեյմի անդամներին Տուսկը վկայակոչում էր պաշտոնական Վարշավայի տրամադրության տակ հայտնված հետախուզական տվյալները։
«Սցենարը, որ ամենահավանականն է թվում, բայց միակը չէ, հետևյալն է։ Հատուկ ծառայությունների գնահատականների համաձայն Ռուսաստանի ծրագրերը անօդաչու թռչող սարքերով և հրթիռներով հարվածներ են նախատեսում Ուկրաինային աջակցություն ցուցաբերող պետությունների տարածքներին, այդ թվում՝ Լեհաստանին։ Նման հավանականության մասին վաղուց էին խոսում։ Այսօր, սակայն, այդ տեղեկատվությունը շատ ավելի հետևողականորեն է ի հայտ գալիս և, ցավոք սրտի, շատ ավելի վստահելի բնույթ է կրում», - հայտարարում էր լեհական կառավարության ղեկավարը։
