Թեև Հայաստանի կառավարությունն արդեն Հայաստանի էլեկտրական ցանցերը հանրային գերակա շահ ճանաչելու որոշման նախագիծ է հրապարակել, ընկերության սեփականատեր Սամվել Կարապետյանն այսօր պնդեց, թե այն չի վաճառվում:
«Ազատության» հարցին, թե ի՞նչ գին է առաջարկել կառավարությանը, Կարապետյանը պատասխանեց. - «ՀԷՑ-ը չի վաճառվում: Եթե չեմ վաճառում, ի՞նչ գին»։
Ընդդիմադիր գործիչը մասնակցում էր իր դատավարությանը:
Լրագրողների հետ ճեպազրույցում պնդեց. «ՀԷՑ-ի մասով մի անհանգստացեք, ՀԷՑ-ը կվերադառնա իր օրինական տիրոջը: Իրենք էլ ոչ մի բան չեն կարողանալու անել: Իրենք արդեն հասկացել են, որ չեն կարողանա կառավարել ՀԷՑ-ը»:
Նախօրեին Տարածքային կառավարման նախարար Դավիթ Խուդաթյանն «Ազատությանն» ասել էր, որ ՀԷՑ-ի շուկայական արժեքը տեղական ընկերություն է գնահատելու:
ՀԷՑ-ը գերակա շահ ճանաչելու որոշման նախագծում փոխհատուցման չափի մասին խոսք չկա: Միայն նշված է, որ գերակա շահ ճանաչելու որոշումը հաջորդել է սեփականատերերի կողմից կառավարության ներկայացրած գնառաջարկը մերժելու փաստին:
